...

باهاردیر!

هاوا، یاغیش قوخوسو ایله دولو.

سن؛

ایشیق ماهنی سی دیلینده،

گونه باخان اکیرسن

موغانین، خان تورپاغیندا.

اوره ییم آتلانیر ایشیقلیغا؛

بوتون آچیق پنجره لرله

بوتون قارانقوشلارلا

گؤروشونه گلیرم گؤزلرینین.

...

یئنه؛

آووجوندا ترلی گونش

بیر آز بولود

بیر دیلیم آی

خان آرازدان قاییدیرسان،

و، منی قوناق ائله ییرسن

بیر" ساری تئل" هاواسینا...

باهاردیر!

هاوا، یاغیش قوخوسو ایله دولو.

ایچیمده کی بوشلوقلار،

تورپاق نفسی ایله تالانیر.

گؤزلریمده گولومسه ییر

آلما چیچک لری- آلچا تومورجوقلاری.

...

بوتون کپنک لری پای وئریرسن منه

و، ندنسه

اوچوشا هوسله نیرم

گونشه دوغرو...

باهاردیر!

هاوا، یاغیش قوخوسو ایله دولو.

بیز...